హైదరాబాద్‌లో వీకెండ్ వచ్చిందంటే చాలు సందర్శనా స్థలాలు, పార్కులు కిక్కిరిసిపోతుంటాయి. వారమంతా కష్టపడిన నగరవాసులు వారాంతంలో మాత్రం అన్ని మర్చిపోయి హాయిగా ఫ్యామిలీతో ఎంజాయ్ చేస్తుంటారు. ఈ క్రమంలోనే చాలా మంది ట్యాంక్‌బండ్‌కు వెళ్లి ఆ అందమైన పరిసరాలను ఆస్వాధిస్తుంటారు. ఆ పక్కనే ఉన్న పార్కుల్లో సరదాగా కాలక్షేపం చేస్తుంటారు. కానీ రేపు మాత్రం ఆ ఛాన్స్ లేదు.
ఎందుకంటే ప్రగతికి చిహ్నంగా తెలంగాణ ఆత్మగౌరవానికి ప్రతీకగా కొత్త సెక్రటేరియట్‌ భవనం నిలవనుంది. అమెరికా అధ్యక్ష భవనం వైట్ హాస్ ను తలపించేలా తెలంగాణ సంస్కృతి, సంప్రదాయాలు ప్రతిబింభించేలా సకల హంగులతో నిర్మితమైన సచివాలయం రేపు (ఆదివారం) మధ్యాహ్నం సమయంలో డాక్టర్ బి.ఆర్ అంబేద్కర్ తెలంగాణ రాష్ట్ర సచివాలయాన్ని సీఎం కేసీఆర్ ప్రారంభించనున్నట్టు తెలిసిందే. ఈ సందర్భంగా సచివాలయం పరిసరాల్లో నెలకొనే రద్దీ పరిస్థితులను దృష్టిలో పెట్టుకొని సాధారణ ప్రజలకు ఎలాంటి ఇబ్బందులు తలెత్తకూడదనే ఉద్దేశంతోనే ఆదివారం రోజు లుంబిని పార్క్, ఎన్టీఆర్ గార్డెన్, ఎన్టీఆర్ ఘాట్, లేజర్ షోలను బంద్ చేస్తున్నట్లు హెచ్ఎండీఏ వెల్లడించింది.
అయితే నగరంలోని సచివాలయం పరిసరాల్లో పోలీసులు ఇప్పటికే ట్రాఫిక్ ఆంక్షలు ప్రకటించిన విషయం తెలిసిందే. పలు మార్గాల ద్వారా వేళ్లేలా రూట్ మ్యాప్ ని హైదరాబాద్ పోలీసులు ఇప్పటికే విడుదల చేశారు. హుసేన్ సాగర్ పరిసర ప్రాంతాల్లో ఉదయం 4 గంటల నుంచి రాత్రి 8 గంటల వరకు ట్రాఫిక్ ఆంక్షలు విధిస్తున్నట్లు ట్రాఫిక్ అదనపు సీపీ సుధీర్ బాబు తెలపారు. అదే విధంగా పీవీ విగ్రహం, నెక్లెస్ రోటరీ, ఎన్టీఆర్ మార్గ్, తెలుగు తల్లి జంక్షన్ వరకు ఇరువైపు ట్రాఫిక్ పరిస్థితిని బట్టి ట్రాఫిక్ నిలిపివేస్తారు. ఎలాంటి అవాంఛనీయ సంఘటనలు జరగకుండా ప్రజలు ఎలాంటి ఇబ్బంది పడకుండా అన్ని జాగ్రత్తలు పాటిస్తున్నట్లు సీపీ తెలిపారు.
మరోవైపు నూతన సచివాలయ ప్రారంభోత్సవం సందర్భంగా అధికారులు భారీ బందోబస్తు ఏర్పాట్లు చేస్తున్నారు. రేపటి కార్యక్రమం కోసం పోలీసు ఉన్నతాధికారులు.. 600 మంది బెటాలియన్ సిబ్బందితో భద్రత ఏర్పాట్లు పూర్తి చేశారు. మరో 600 మంది సెక్యూరిటీ సిబ్బంది రెండు షిఫ్ట్‌లలో పనిచేయనున్నారు. అదనపు పోలీస్ కమిషనర్ నేతృత్వంలో బందోబస్తు.. ఏర్పాట్లు కొనసాగిస్తున్నారు. రేపటి కార్యక్రమాల కోసం అధికారులు ముందస్తు సెక్యూరిటీ బ్రీఫింగ్ చేస్తున్నారు. రేపు ఉదయం 5 గంటల నుంచి సాయంత్రం వరకు భారీగా బందోబస్తు ఏర్పాట్లు కొనసాగనున్నాయి.
