40 శాతం పైగా కోత తర్వాత, టిమ్ కుక్ వార్షిక జీతం 49 మిలియన్ డాలర్లు,
Apple CEO Salary: ఐఫోన్ (iPhone) తయారీ సంస్థ యాపిల్ చీఫ్ ఎగ్జిక్యూటివ్ ఆఫీసర్ టిమ్ కుక్ (Apple CEO Tim Cook), తన జీతభత్యాల్లో స్వచ్ఛందంగా భారీ కోతను విధించుకున్నారు. బ్లూంబెర్గ్ నివేదిక ప్రకారం.. తన వేతనాన్ని తగ్గించాలని సీఈవో టిమ్ కుక్ స్వయంగా కంపెనీని అభ్యర్థించారు. ఈ అభ్యర్థన తరువాత, టిమ్ కుక్ జీతభత్యాలు (compensation) 40 శాతానికి పైగా తగ్గాయి.
తగ్గింపు తర్వాత ఎంత జీతం వస్తుంది?
భారీ జీతం కోత తర్వాత, కుక్ వార్షిక వేతనం $49 మిలియన్లు లేదా 4 బిలియన్ రూపాయలకు తగ్గింది. ఈ కొత్త జీతం 2023 ప్రారంభం నుండి అమలులోకి వస్తుంది. 2022లో, టిమ్ కుక్ $99.4 మిలియన్ల జీతం ప్యాకేజీని అందుకున్నాడు, ఇందులో ప్రాథమిక జీతం $3 మిలియన్లు మరియు 83 మిలియన్ డాలర్ల విలువైన స్టాక్ అవార్డులు మరియు బోనస్‌లు ఉన్నాయి. అదనంగా, కుక్ పదవీ విరమణ ప్రణాళికలు, భద్రత, విమాన ప్రయాణం మరియు విహారయాత్రలకు సంబంధించిన పరిహారం కోసం $46,000 పొందారు.
2021లో, టిమ్ కుక్ యాపిల్ ద్వారా మొత్తం $98.7 మిలియన్లు చెల్లించారు. 2022లో ఇది కాస్త పెరిగింది. వాటాదారుల అభిప్రాయం, కంపెనీ పనితీరు, కుక్ అభ్యర్థన మేరకు సీఈవో కుక్ ప్యాకేజీని తగ్గించాలని నిర్ణయించినట్లు Apple Inc తెలిపింది.
ప్యాకేజీ మీద విమర్శలు
గత సంవత్సరం, టిమ్ కుక్ $99.4 మిలియన్ల ప్యాకేజీని అందుకున్నాడు, ఇది చాలా మంది వాటాదారుల నుండి విమర్శలకు దారితీసింది. అయినప్పటికీ, మెజారిటీ వాటాదారులు (64 శాతం) అనుకూలంగా ఓటు వేయడంతో, ప్యాకేజీ విజయవంతమైంది. గత ఏడాది కుక్ ఈక్విటీ అవార్డుల విలువ 75 మిలియన్ డాలర్లు.
ఈ సంవత్సరం టిమ్ కుక్ యొక్క పే ప్యాకేజీకి వాటాదారుల నుండి తీవ్ర వ్యతిరేకత ఎదురైంది, వారు కుక్ జీతం తగ్గించాలని కంపెనీపై ఒత్తిడి తెచ్చారు. అదనంగా, పదవీ విరమణపై ఇచ్చే స్టాక్ అవార్డుల పరిమాణాన్ని తగ్గించడానికి కంపెనీ అంగీకరించింది. కంపెనీ షేర్లు గత సంవత్సరంలో 27% పడిపోయాయి, అయితే ఈ సంవత్సరం ఇప్పటివరకు 2.7% లాభపడ్డాయి. కంపెనీ మార్కెట్ విలువ 2.122 ట్రిలియన్ డాలర్లు.
ప్రస్తుతం టిమ్ కుక్ వయస్సు 62 సంవత్సరాలు. వయస్సు అన్నది కేవలం ఒక సంఖ్య మాత్రమే అన్నది ఈయన విషయంలో నిజమైంది. 62 ఏళ్ల వయస్సులోనూ 26 ఏళ్ల కుర్రాడిలో ఉన్నంత ఉత్సాహం చూపిస్తారు. తన సంపదను స్వచ్ఛంద సేవ కార్యక్రమాలకు విరాళంగా ఇవ్వాలని టిమ్ కుక్ నిర్ణయించుకున్నారు.
