ఆంధ్రప్రదేశ్‌లో విద్యాబుద్ధులు చెప్పాల్సిన ఉపాధ్యాయులు అప్పుడప్పుడు తమ బాధ్యతలను మరిచి వివాదాలకు కేంద్రబిందువవుతుంటారు. కానీ, విజయనగరం జిల్లా బొబ్బిలిలోని పెంట జెడ్పీ పాఠశాల ప్రధానోపాధ్యాయుడు చింతా రమణ మాత్రం విద్యార్థుల చదువుపై పట్టుదలతో, వారికి మంచి భవిష్యత్తు ఇవ్వాలనే సంకల్పంతో తాను విభిన్న చర్యలకు పాల్పడ్డారు.
పాఠశాలలో విద్యార్థుల విద్యా స్థాయి రోజురోజుకూ దిగజారడం చూసి, వారి తల్లిదండ్రులు కూడా పట్టించుకోకపోవడంతో చింతా రమణ తీవ్ర ఆవేదన చెందారు. విద్యార్థులు మారలేదని, తల్లిదండ్రులు శ్రద్ధ వహించడం లేదని అనిపించడంతో, చివరికి తమ బాధను వ్యక్తం చేసేందుకు ఆయన తనకే శిక్ష విధించుకున్నారు.
ఒకరోజు పాఠశాలలో విద్యార్థులంతా హాజరైన సమయంలో రమణ వారందరి ముందు నిలబడి, “మేము మిమ్మల్ని కొట్టలేం, తిట్టలేం, మీకు ఏ శిక్ష విధించలేం. ఇక మేము చేతులూ కట్టుకుని ఉండాల్సిన పరిస్థితి వచ్చింది,” అంటూ బాధను వ్యక్తం చేశారు. ఆ తర్వాత విద్యార్థుల ఎదుటే సాష్టాంగ నమస్కారం చేసి, వారిని మారాలని వేడుకున్నారు. అంతటితో ఆగకుండా, ఆయన గుంజీలు తీసి, విద్యార్థులు మారకపోతే తన బాధ అంతా తనపైనే వేసుకున్నట్లు ప్రదర్శించారు.
విద్యార్థులు భయంతో “వద్దు సార్, గుంజీలు తీయవద్దు,” అని వేడుకున్నా, ఆయన ఆగలేదు. ఈ ఘటన పాఠశాలలో ఒక్కసారిగా ప్రకంపనలు సృష్టించింది. కొంత మంది దీనిపై అభ్యంతరం వ్యక్తం చేయగా, మరికొందరు ఆయన నిబద్ధతను మెచ్చుకున్నారు.
ఈ సంఘటనపై ఆంధ్రప్రదేశ్ మంత్రి నారా లోకేష్ స్పందించారు. సోషల్ మీడియాలో వైరల్ అయిన ఈ వీడియోను గమనించిన లోకేష్, హెడ్మాస్టర్ చింతా రమణ చర్యలపై అభినందనలు వ్యక్తం చేశారు. “హెడ్మాస్టర్ గారూ! అంతా కలిసి పనిచేస్తే, మన ప్రభుత్వ పాఠశాలల విద్యార్థులు అద్భుతాలు సృష్టిస్తారు. మీరు స్వీయక్రమశిక్షణ చూపించిన తీరు కరెక్టే కానీ, పిల్లలను ప్రోత్సహిస్తూ మార్గనిర్దేశం చేస్తే ఇంకా మంచి ఫలితాలు వస్తాయి,” అని అన్నారు.
అంతేగాక, విద్యాశాఖ నిరంతరం 100% ఫలితాల ఒత్తిడిని పెంచడం వల్లే ఉపాధ్యాయులు ఇలాంటి చర్యలకు దిగాల్సి వస్తోందనే విమర్శలు కూడా వినిపిస్తున్నాయి. ఈ నేపథ్యంలో, పిల్లల చదువులు మెరుగుపరచడానికి అందరూ కలిసికట్టుగా పని చేసి, వారి భవిష్యత్తును వెలిగించేందుకు కృషి చేయాలని ఆయన పిలుపునిచ్చారు.
చింతా రమణ చేసిన పని కొందరికీ తీవ్రతరంగా అనిపించినా, ఆయన నిబద్ధత, విద్యార్థులపై ఉన్న ప్రేమ, భాద్యత స్పష్టంగా కనిపిస్తున్నాయి. లోకేష్ అభినందనలతో కొత్త ఉత్సాహాన్ని పొందిన రమణ, విద్యార్థులకు మంచి మార్గదర్శకుడిగా నిలిచేలా ప్రయత్నిస్తున్నారు. ఈ సంఘటన రాష్ట్ర వ్యాప్తంగా చర్చనీయాంశమవగా, పిల్లల భవిష్యత్తు కోసం అందరూ కలిసి కృషి చేయాలని సందేశాన్ని అందించింది.
విజయనగరం జిల్లా, బొబ్బిలి మండ‌లం, పెంట జెడ్పీ హైస్కూల్ హెడ్మాస్టర్ చింత రమణ గారు పిల్లల విద్యా పురోగ‌తి అంతంత‌మాత్రంగా ఉంద‌ని, చెప్పిన మాట విన‌డంలేద‌ని….విద్యార్థుల‌ను దండించ‌కుండా, గుంజీలు తీసిన వీడియో సోషల్ మీడియా ద్వారా నా దృష్టికి వచ్చింది. హెడ్మాస్ట‌రు గారూ!… pic.twitter.com/Se7zu6uwf5
— Lokesh Nara (@naralokesh) March 13, 2025
