చెన్నైలోని చెపాక్ స్టేడియంలో 17 ఏళ్ల తర్వాత బెంగళూరు రాయల్ ఛాలెంజర్స్ జట్టు ఘన విజయం సాధించింది. 2008లో ఐపీఎల్ తొలి సీజన్‌లో చెపాక్‌లో గెలిచిన ఆర్సీబీ, అప్పటి నుంచి అక్కడ ఒక్క మ్యాచ్‌ను కూడా నెగ్గలేదు. అయితే, 2025 ఐపీఎల్ సీజన్‌లో రజత్ పాటీదార్ నాయకత్వంలో ఆ జట్టు ఈ చిరకాల రికార్డుని బద్దలు కొట్టింది. చెపాక్ స్టేడియంలో సీఎస్కేపై ఆర్సీబీ 50 పరుగుల తేడాతో విజయం సాధించింది. చెన్నై మైదానంలో ఇప్పటి వరకు వరుస ఓటములు చవిచూసిన బెంగళూరు ఈ సారి అద్భుత ప్రదర్శన చేసి చరిత్రను తిరగరాసింది. ఆర్సీబీ బౌలర్లు చెన్నై బ్యాటింగ్ లైనప్‌ను కుప్పకూల్చి చెన్నైలో ఘన విజయం సాధించారు.
ఆర్సీబీ బ్యాటింగ్‌లో రజత్ పాటీదార్ 51 పరుగులతో అద్భుత ఇన్నింగ్స్ ఆడాడు. ఫిల్ సాల్ట్ 32, పడిక్కల్ 27, టిమ్ డేవిడ్ 22 పరుగులతో చక్కటి ప్రదర్శన అందించారు. బ్యాటింగ్‌లో కీలక ఆటగాళ్లు తమ వంతు బాధ్యతను పోషించి చెన్నై బౌలర్లను ఒత్తిడిలోకి నెట్టారు. ఆర్సీబీ బౌలింగ్ విభాగంలో హేజిల్‌వుడ్ 3 వికెట్లు, యశ్ దయాళ్ 2 వికెట్లు, లివింగ్‌స్టన్ 2 వికెట్లు తీసి కీలక పాత్ర పోషించారు. చెన్నై బౌలర్లు ఎక్కువ పరుగులు సమర్పించుకోవడంతో ఆ జట్టుకు కఠినమైన లక్ష్యం ఎదురైంది.
East or West,#RCB never fails to give its best!
What a clean sweep boys! A much deserving win against Chennai Super Kings! 🏏 #EeSalaCupNamde #RCBvsCSK pic.twitter.com/dIPOGpif5v
— Nikhil Kumar (@Nikhil_Kumar_k) March 28, 2025
197 పరుగుల విజయ లక్ష్యంతో బరిలోకి దిగిన సీఎస్కే, ఆర్సీబీ బౌలర్ల దెబ్బకు పూర్తిగా కుప్పకూలింది. మ్యాచ్ ఆరంభంలోనే హేజిల్‌వుడ్ తన తొలి ఓవర్లో త్రిపాఠి, రుతురాజ్‌లను ఔట్ చేసి చెన్నైకు షాక్ ఇచ్చాడు. మిడిలార్డర్‌లో దీపక్ హుడా, సామ్ కరన్ కూడా పెద్దగా ప్రభావం చూపలేకపోయారు. చెన్నై బ్యాటింగ్ ఆరంభం నుంచే ఒత్తిడిలో పడిపోయింది. కీలక వికెట్లు కోల్పోవడంతో రన్‌రేట్ పెంచే అవకాశం లేకుండా పోయింది. చివర్లో రచిన్ రవీంద్ర ఒక్కడే వికెట్ కాపాడుకుంటూ నిలిచాడు. ధోనీ ముగింపు దశలో వచ్చి మూడు ఫోర్లు, రెండు సిక్సులు బాదినా అప్పటికే ఫలితం ఆర్సీబీ వైపు ఒరిగిపోయింది.
17 ఏళ్లుగా చెన్నైలో ఓటముల పర్వాన్ని కొనసాగించిన బెంగళూరు జట్టు ఎట్టకేలకు ఈ నెగటివ్ రికార్డును చెరిపేసుకుంది. ఆర్సీబీ అభిమానులకు ఇది చిరస్మరణీయ విజయంగా నిలిచిపోయింది. చెన్నై వేదికగా సీఎస్కేను ఓడించడం ద్వారా ఆ జట్టు కాన్ఫిడెన్స్‌ను మరింత పెంచుకుంది. ఈ విజయంతో బెంగళూరు ప్లేఆఫ్ అవకాశాలను బలపరచుకుంది.
