తెలంగాణలో పదో తరగతి పరీక్షలు మొదలైన మొదటి రోజే పేపర్ లీక్ కలకలం రేగింది. నల్గొండ జిల్లా నకిరేకల్‌లోని TSWR గురుకుల పాఠశాలలో ఇన్విజిలేటర్ ఒకరు తెలుగు ప్రశ్నాపత్రాన్ని ఫోటో తీసి బయటకు పంపాడు. ఈ ఘటనపై ఉన్నతాధికారులు స్పందించి సంబంధిత ఇన్విజిలేటర్‌ను విధుల నుంచి తొలగించడంతో పాటు, పరీక్షా కేంద్రంలోని మరో ఇద్దరు అధికారులకు షోకాజ్ నోటీసులు జారీ చేశారు. ఇంకా, ఓ విద్యార్థిని డీబార్ చేసినట్లు అధికారులు వెల్లడించారు.
ఇదిలా ఉండగా, రాష్ట్రంలోని మరో పరీక్షా కేంద్రంలో అవ్యవస్థలు బయటపడ్డాయి. మంచిర్యాల జిల్లాలోని బాయ్స్ హైస్కూల్‌లో విద్యార్థులకు తెలుగు పేపర్‌కు బదులుగా హిందీ ప్రశ్నాపత్రాన్ని అందజేయడం గందరగోళానికి దారితీసింది. ఈ తప్పిదాన్ని ఆలస్యంగా గుర్తించిన అధికారులు, సరైన ప్రశ్నాపత్రాన్ని తెప్పించి పరీక్షను ప్రారంభించగా, అప్పటికే రెండు గంటలు గడిచిపోయింది.
ఈ ఘటనల నేపథ్యంలో జిల్లా కలెక్టర్ కుమార్ దీపక్ సీరియస్ అయ్యారు. ప్రశ్నాపత్రాల పంపిణీలో అధికారుల నిర్లక్ష్యం, పరీక్షల ఆలస్యంపై డీఈవోకు తక్షణ విచారణ చేపట్టి నివేదిక అందించాలని ఆదేశాలు జారీ చేశారు. పరీక్షా వ్యవస్థలో ఇటువంటి తప్పిదాలు విద్యార్థుల భవిష్యత్తుపై తీవ్ర ప్రభావం చూపిస్తాయని తల్లిదండ్రులు ఆందోళన వ్యక్తం చేస్తున్నారు.
