ఏపీ మాజీ సీఎం వైఎస్ జగన్ మోహన్ రెడ్డి అక్రమాస్తుల కేసులో మరోసారి కీలక పరిణామం చోటుచేసుకుంది. ఈ కేసులో సీబీఐ ఛార్జ్‌షీట్‌ నుంచి తమ సంస్థ పేరును తొలగించాలంటూ వాన్పిక్ దాఖలు చేసిన పిటిషన్‌ను తెలంగాణ హైకోర్టు తిరస్కరించింది. గతంలో సీబీఐ వాన్పిక్ పేరును తన ఛార్జ్‌షీట్‌లో చేర్చగా, ప్రస్తుతం నాంపల్లి సీబీఐ కోర్టులో విచారణ కొనసాగుతోంది.
ఇక 2022 జులైలో వాన్పిక్ ప్రాజెక్ట్‌ పిటిషన్‌ను హైకోర్టు అనుమతించగా, ఆ ఉత్తర్వులను సీబీఐ సుప్రీంకోర్టులో సవాల్ చేసింది. తమ వాదనలను పరిగణనలోకి తీసుకోకుండా హైకోర్టు అనుమతి ఇచ్చిందని సీబీఐ వాదించింది. ఈ నేపథ్యంలో సుప్రీంకోర్టు, హైకోర్టుకు మరోసారి పిటిషన్‌ను విచారించాలని ఆదేశాలు జారీ చేసింది. తాజాగా వాన్పిక్ ప్రాజెక్టుపై వాదనలు విన్న హైకోర్టు, పిటిషన్‌ను మళ్లీ రిజెక్ట్ చేసింది.
చైర్మన్‌గా నిమ్మగడ్డ ప్రసాద్
వాన్పిక్ ప్రాజెక్టు ఉమ్మడి ఏపీ సీఎం వై.ఎస్. రాజశేఖరరెడ్డి హయాంలో ఆరంభమైంది. అప్పటి ఏపీ ప్రభుత్వం గల్ఫ్ దేశానికి చెందిన రాస్ అల్ ఖైమా ప్రభుత్వంతో కలిసి ఈ ప్రాజెక్టును చేపట్టింది. ఈ ప్రాజెక్టుకు నిమ్మగడ్డ ప్రసాద్ చైర్మన్‌గా వ్యవహరించారు. ఈ ప్రాజెక్టు కోసం నిబంధనలను ఉల్లంఘించి సుమారు 15,000 ఎకరాలకు పైగా భూములు కేటాయించారని, దానికి ప్రతిఫలంగా నిమ్మగడ్డ ప్రసాద్ వైఎస్ జగన్ మోహన్ రెడ్డి కంపెనీలలో భారీగా పెట్టుబడులు పెట్టారని సీబీఐ ఆరోపించింది.
