హైదరాబాద్‌లోని గణేష్ లడ్డూ రికార్డు ధర పలికింది. రాజేంద్రనగర్‌లోని బండ్లగూడ జాగీర్‌లోని కీర్తి రిచ్మండ్ విల్లావాసులు శుక్రవారం జరిగిన వినాయక లడ్డూ వేలంలో రూ. 2,31,95,000 పైగా చెల్లించి దక్కించుకున్నారు.
గతేడాది ఇదే కమ్యూనిటీలో లడ్డూ రూ. 1.87 కోట్లు పలికింది. ఈ వేలానికి స్థానిక భక్తులతో పాటు ఇతర ప్రాంతాల ప్రజలు కూడా హాజరవుతూ ఉంటారు. ఈసారి వేలం రూ. 1 కోటి నుంచి ప్రారంభమైంది.
బిడ్డింగ్ ఉత్సాహంగా జరిగింది. 80 కంటే పైగా విల్లా యజమానులు నాలుగు గ్రూపులుగా విభజించి, రెండు గంటల్లో దాదాపు 500కి పైగా బిడ్లు వేశారు. చివరగా, పదికేజీల లడ్డూను రూ. 2 కోట్లకు పైగా కొనుగోలు చేశారు.
2018లో కేవలం రూ. 25,000తో ప్రారంభమైన ఈ వేలం, ఇప్పుడు తెలంగాణలో అత్యంత ఖరీదైన పండుగ లడ్డూలలో ఒకటిగా ఎదిగింది. గతంలో కొన్ని రికార్డులు ఇలా ఉన్నాయి:
2019: రూ. 18.75 లక్షలు
2020: రూ. 27.3 లక్షలు
2021: రూ. 41 లక్షలు
2022: రూ. 60 లక్షలు
2023: రూ. 1.26 కోట్లు
2024: రూ. 1.87 కోట్లు
ఈ వేలం ద్వారా వచ్చే ఆదాయం సాధారణంగా స్వచ్ఛంద సేవా కార్యక్రమాలకు ఉపయోగిస్తారు.
అలాగే, రాయదుర్గంలోని మై హోమ్ భుజా లడ్డూ కూడా ఫేమస్. ఈ లడ్డూ వేలం ప్రతి సంవత్సరం రికార్డు ధరలకు దూకుతూ ఉంటుంది. ఈ ఏడాది ఖమ్మం నుంచి రియల్ ఎస్టేట్ వ్యాపారి కొండపల్లి గణేశ్ రూ. 51,07,777కి ఈ లడ్డూను సొంతం చేసుకున్నారు. గతేడాది మై హోమ్ భుజా లడ్డూను కూడా ఆయన రూ. 29 లక్షలకు పడ్డారు.
