ఆంధ్రప్రదేశ్ లోని అంభేద్కర్ కోనసీమ జిల్లా అమలాపురం పట్టణం ట్రాఫిక్ పోలీసులు వినూత్నంగా తమదైన శైలిలో ప్రచారం చేస్తున్నారు. నాన్న నెమ్మదిగా రా.. హెల్మెట్ పెట్టుకో అంటూ పలు ఫ్లెక్సీలు ఏర్పాటు చేశారు. హెల్మెట్ ధరించకపోతే ఇక నుంచి 100 రూ.లు కాదు 1000 ఫైన్…కట్టాలి. కాబట్టి డబ్బులు ఊరికే రావు అంటూ .. జాగ్రత్తలు తీసుకోండి అంటూ వినూత్నంగా లలితా జ్యూవెలరీ యజమాని ఫొటోతో పెద్ద అక్షరాలతో డబ్బులు ఊరికే రావు అనే కాప్షన్ హైలెట్ చేస్తూ ప్రచారం చేస్తున్నారు.
ఇక అమలాపురంలో ట్రాఫిక్ పోలీసులు కొత్తగా మార్చి 1వ తేది నుండి అమలులోకి వచ్చిన ట్రాఫిక్ రూల్స్ పై ప్రజలకు అవగాహన కల్పిస్తున్నారు. కష్టపడి సంపాదించిన డబ్బులను మీ తొందరపాటు చర్యలవల్ల చలానాలుగా కడుతుంటే మీకే నష్టం అని డబ్బులు ఊరికే రావు అంటూ లలితా జ్యూవెలరీ అధినేత ఫోటోతో ఫ్లెక్సీలు ఏర్పాటు చేసి హెచ్చరిస్తున్నారు. అలాగే చలానా 100 కాదు ఇక నుంచి 1000 రూపాయలని ఇది ప్రతి ఒక్కరు గుర్తుంచుకోవాలని ప్రతి వారు ట్రాఫిక్ రూల్స్ పాటించి సురక్షితంగా తమ తమ గమ్యస్థానాలకు చేరాలని అమలాపురం డీఎస్పీ ప్రసాద్ కోరుతున్నారు.
ప్రతి ఒక్కరూ హెల్మెట్ ధరించాలి, డ్రైవింగ్ లైసెన్స్ తమ దగ్గర ఉంచుకోవాలని, రూల్స్ అతిక్రమిస్తే ఫైన్స్ విధించడమే కాకుండా జైలు శిక్ష కూడా పడుతుందని తెలిపారు. ఏపీలో మార్చి ఒకటో తేదీ నుండి కొత్త ట్రాఫిక్ రూల్స్ అమల్లోకి వచ్చాయని ఇప్పటికే ఆయా జిల్లాలకు చెందిన ఎస్పీలు హెచ్చరికలు చేశారు. రోడ్డు ప్రమాదాల నివారణే లక్ష్యంగా మార్చి 1వ తేదీ నుంచి కేంద్ర మోటార్ వెహికల్ చట్టం అమల్లోకి తీసుకొచ్చారు. కొత్త ట్రాఫిక్ రూల్స్ ప్రకారం జరిమానాలు మోత మోగనున్నాయి. ఈ కొత్త చట్టాన్ని రాష్ట్రంలో పూర్తిస్థాయిలో అమలు చేసేందుకు ప్రభుత్వం సిద్ధమైంది. నూతన జరిమానాలను విధించేందుకు రవాణా శాఖలోని అధికారులతో పాటు పోలీస్ శాఖ కూడా సిద్ధమైంది.
ప్రస్తుతం వాహనదారులు నిబంధనలు అతిక్రమిస్తే విధించే జరిమానాలను పెంచినట్లు ట్రాఫిక్ పోలీసులు స్పష్టం చేస్తున్నారు. డ్రైవింగ్ లైసెన్స్ లేకుండా వాహనాన్ని నడిపితే రూ. 5000, వాహనానికి ఇన్సూరెన్స్ లేని పక్షంలో మొదటిసారి రూ. 2000, రెండవ సారి రూ. 4000, పొల్యూషన్ సర్టిఫికెట్ లేని పక్షంలో రూ. 1500 ఫైన్ విధిస్తారు. హెల్మెట్ ధరించకుండా బైక్ నడిపే వారికి రూ. 1000, అలాగే బైక్ వెనుక సీట్ లో కూర్చున్న వ్యక్తి హెల్మెట్ ధరించని పక్షంలో రూ. 1000, అతివేగంతో వాహనాన్ని నడిపితే మొదటిసారి రూ. 1500, రెండవసారి రూ. 10000, ఆటో, లారీ డ్రైవర్లు యూనిఫామ్ ధరించకుండా వాహనాన్ని నడిపితే మొదటిసారి రూ. 150, రెండవసారి రూ. 300, వాహన తనిఖీ అధికారులకు సహకరించని వాహన యజమానులకు రూ. 750, కారులో ప్రయాణించేవారు సీటు బెల్ట్ ధరించని పక్షంలో రూ. 1000, కారు డ్రైవర్ సీట్ బెల్ట్ ధరించని పక్షంలో మరో రూ. 1000, వాహన రిజిస్ట్రేషన్ లేనిపక్షంలో రూ. 2000, ఫిట్నెస్ సర్టిఫికెట్ లేని పక్షంలో మొదటిసారి రూ. 2000, రెండవ సారి రూ. 5000, రేసింగ్ వంటి కార్యకలాపాలకు పాల్పడితే మొదటిసారి రూ. 5000, రెండవసారి రూ. 10000, మితిమీరిన వేగంతో వాహనం నడిపితే రూ. 1000, ద్విచక్ర వాహనంపై ముగ్గురు ప్రయాణిస్తే రూ. 1000 జరిమానా విధించనున్నారు.
