‘కోటి మంది మహిళలను కోటీశ్వరులను చేయడమే మా లక్ష్యం’ అని తెలంగాణ ముఖ్యమంత్రి రేవంత్ రెడ్డి తెలిపారు. హైదరాబాద్‌లోని We Hub లో నిర్వహించిన Women Acceleration Program లో ఆయన మాట్లాడుతూ, పట్టణ ప్రాంతాల్లోని మహిళలను స్వయం సహాయక సంఘాల (SHGs) లో చేర్చేలా ప్రత్యేక డ్రైవ్ నిర్వహించాలని అధికారులకు సూచించారు.
రాష్ట్ర ప్రభుత్వం మహిళల ఆర్థికాభివృద్ధికి అనేక ప్రోత్సాహక కార్యక్రమాలు అమలు చేస్తోందని సీఎం వివరించారు. ఇందిరాగాంధీ కాలంలో మహిళా శక్తి ప్రపంచానికి తెలియజేయబడిందని, అదే ఆదర్శాన్ని తమ ప్రభుత్వం కొనసాగిస్తోందన్నారు. “మహిళలే దేశానికి అండ, మహిళా శక్తే దేశాన్ని గెలిపించే శక్తి,” అని పేర్కొన్నారు.
సీఎం మాట్లాడుతూ:
మహా లక్ష్మి పథకం ద్వారా ఆర్టీసీ బస్సుల్లో మహిళలకు ఉచిత ప్రయాణ సదుపాయం కల్పించాం.
అమ్మ ఆదర్శ పాఠశాలల ద్వారా ప్రభుత్వ పాఠశాలల నిర్వహణను మహిళలచే చేయిస్తున్నాం.
విద్యార్థుల యూనిఫార్మ్ కుట్టు పనిని మహిళా సంఘాలకు అప్పగించి ఉపాధి కల్పించాం.
పెట్రోల్ బంకులు, సోలార్ విద్యుత్ వ్యాపారాల కోసం మహిళలను ప్రోత్సహిస్తున్నాం.
శిల్పారామంలో SHGs ఉత్పత్తులకు స్టాల్స్ కేటాయించాం.
ఉత్పత్తుల్ని రాష్ట్ర అతిథులకు బహుమతులుగా అందిస్తూ వారిని గౌరవిస్తున్నాం.
సీఎం రేవంత్ రెడ్డి, మహిళల ఆర్థిక క్రమశిక్షణపై ప్రశంసలు కురిపిస్తూ, “కార్పొరేట్ కంపెనీల కంటే మా ఆడబిడ్డలు అప్పు విషయంలో ఎంతో నమ్మకమైనవారు. వారు వడ్డీతో సహా సక్రమంగా రిపేమెంట్ చేస్తున్నారు” అని అన్నారు.
వెయ్యి మెగావాట్ల సోలార్ విద్యుత్ ప్రాజెక్టులు ఇప్పటికే మహిళలకు అప్పగించగా, అవసరమైతే మరిన్ని 1,000 మెగావాట్లు కూడా ఇవ్వడానికి సిద్ధంగా ఉన్నట్లు తెలిపారు.
“మీ రేవంతన్నగా, మీకు అన్ని విధాలా సహకరిస్తాను. కోటి మంది మహిళలతో ఒక ఆర్థిక విప్లవం తీసుకురావడమే మా లక్ష్యం,” అని సీఎం భరోసా ఇచ్చారు.
