రాష్ట్రంలో అధికారంలోకి వచ్చిన కాంగ్రెస్ ప్రభుత్వం, వచ్చే బతుకమ్మ పండుగ సందర్భంగా మహిళా పొదుపు సంఘాల సభ్యులకు ఇందిరమ్మ చీరలు ఇవ్వాలని నిర్ణయించింది. ఈ పథకం అందరు మహిళలకు వర్తించదు, కేవలం పొదుపు సంఘాలకే ప్రత్యేకం. ప్రతి మహిళకు ఉచితంగా రెండు చీరలు అందజేయనుంది.
ఎన్నికల సమయంలో ఇచ్చిన హామీలను అమలు చేస్తూ, ప్రభుత్వం ఈ కార్యక్రమాన్ని ముందుకు తీసుకెళ్తోంది. ఇందుకోసం చీరల తయారీ పనులు ఇప్పటికే వేగవంతమయ్యాయి. సిరిసిల్ల నేత కార్మికులకు ప్రభుత్వం ఆర్డర్ ఇచ్చి, దాదాపు 65 లక్షల చీరల ఉత్పత్తి పనులు అప్పగించింది. ఇప్పటివరకు రెండు విడతల్లో 9 కోట్ల మీటర్ల వస్త్రం నేతలకు అందించబడింది.
గత ప్రభుత్వం ప్రతి బతుకమ్మ పండుగకు ఒక్కో చీరను మాత్రమే అందించేది. అయితే కాంగ్రెస్ ప్రభుత్వం అధికారంలోకి వచ్చిన తర్వాత బతుకమ్మ చీరల పథకాన్ని నిలిపివేయడంతో విమర్శలు వచ్చాయి. ఇప్పుడు ‘ఇందిరా మహిళా శక్తి’ స్కీమ్‌లో భాగంగా, పొదుపు సంఘాల మహిళలకు రెండు చీరలు ఇవ్వాలని నిర్ణయించింది.
ఈ ఆర్డర్ కారణంగా సిరిసిల్ల నేత కార్మికులకు ఏడాది పొడవునా ఉపాధి కల్పించబడింది. ప్రస్తుతం సుమారు 6 వేలమంది నేత కార్మికులు పనిచేస్తూ, నెలకు దాదాపు రూ.20 వేల వరకు సంపాదిస్తున్నారు. ఇప్పటివరకు 30 లక్షల చీరలు పూర్తయ్యాయి. మరో 30 లక్షల చీరలు బతుకమ్మ పండుగ నాటికి సిద్ధం చేయడానికి కార్మికులు మూడు షిఫ్టుల్లో పని చేస్తున్నారు.
అధికారుల ప్రకారం, ఈ సారి అందించే ఇందిరమ్మ చీరలు గతంలో ఇచ్చిన బతుకమ్మ చీరల కంటే నాణ్యతతో తయారు అవుతున్నాయి. ఒక్కో చీర మార్కెట్ విలువ సుమారు రూ.800 వరకు ఉంటుందని చెబుతున్నారు. బతుకమ్మ పండుగకు ముందే ఈ చీరలు రాష్ట్రంలోని అన్ని మహిళా పొదుపు సంఘాల సభ్యులకు అందజేయనున్నట్లు ప్రభుత్వం ప్రకటించింది.
