భారత ప్రధాని నరేంద్ర మోదీ, చైనా అధ్యక్షుడు జిన్‌పింగ్ భేటీలో కీలక పరిణామం చోటుచేసుకుంది. ఇప్పటివరకు పాకిస్తాన్‌కు మద్దతుగా నిలిచిన చైనా, ఈసారి భారత్‌కు పూర్తి సపోర్ట్ ఇవ్వబోతున్నట్లు ప్రకటించింది. టెర్రరిజంపై పోరాటంలో భారత్‌కు తోడ్పాటును అందిస్తామని హామీ ఇచ్చింది.
ఇక ఆపరేషన్ సింధూర్ సమయంలో పాకిస్తాన్‌కు ఫైటర్ జెట్లు, ఆయుధాలు సమకూర్చిన చైనా, ఇప్పుడు తన వైఖరిని మార్చుకోవడం గమనార్హం. అమెరికా అధ్యక్షుడు ట్రంప్‌తో పాక్ స్నేహం, ఆ తర్వాతి పరిణామాలు చైనాను దూరం చేశాయని విశ్లేషకులు చెబుతున్నారు. ప్రస్తుతం భారత్, చైనా, రష్యా ముగ్గురూ ట్రంప్‌ను “చచ్చిన పాము”గా ట్రీట్ చేస్తున్నారన్నది అంతర్జాతీయ రాజకీయాల్లో పెద్ద చర్చగా మారింది.
మోదీ పర్యటన – SCO సదస్సు హైలైట్స్
ప్రధాని మోదీ చైనాలోని తియాంజిన్ నగరంలో జరుగుతున్న షాంఘై సహకార సంస్థ (SCO) శిఖరాగ్ర సదస్సులో పాల్గొన్నారు. ఈ సదస్సులో చైనా అధ్యక్షుడు జిన్‌పింగ్, రష్యా అధ్యక్షుడు వ్లాదిమిర్ పుతిన్‌తో పాటు అనేక మంది ప్రపంచ నాయకులు పాల్గొన్నారు. దాదాపు 10 నెలల తర్వాత మోదీ-జిన్‌పింగ్ భేటీ జరగడం ప్రాధాన్యత సంతరించుకుంది.
ఈ చర్చల్లో:
సరిహద్దు శాంతి, సుస్థిరతపై దృష్టి
ఉగ్రవాదం నిర్మూలనపై చర్చ
సరిహద్దు సమస్యలు వివాదాలుగా మారకూడదని స్పష్టీకరణ
ఇరువురు నేతలు ప్రపంచ వాణిజ్యాన్ని స్థిరీకరించడానికి కలిసి పనిచేయాలని నిర్ణయించారు. అమెరికా విధించిన సుంకాల ఒత్తిడి నేపథ్యంలో ఈ నిర్ణయం కీలకమైంది.
భారత్-చైనా కొత్త దిశలో
మోదీ పర్యటనపై చైనా మీడియా, సోషల్ మీడియాలో విస్తృత చర్చ జరిగింది. అమెరికా ఒత్తిడికి లొంగకుండా మోదీ ధైర్యంగా వ్యవహరిస్తున్న తీరు ప్రశంసలందుకుంది. ఏడేళ్ల తర్వాత మోదీ చైనాలో అడుగుపెట్టడం, 2020 గల్వాన్ లోయ ఘర్షణల తర్వాత తొలి పర్యటన కావడం ఈ భేటీకి ప్రత్యేకతను ఇచ్చింది.
మోదీ కోసం ప్రత్యేకంగా జిన్‌పింగ్‌కి ఇష్టమైన ‘హాంగ్‌క్వీ’ కారును ఏర్పాటు చేయడం గౌరవ సూచికంగా నిలిచింది. ఇరు దేశాలు ద్వైపాక్షిక సంబంధాలను బలోపేతం చేసుకోవాలని భావిస్తున్నాయి. చైనా అధ్యక్షుడు స్పష్టంగా చెప్పినట్లు.. “భారత ఏనుగు, చైనా డ్రాగన్ కలిసి నాట్యం చేయాలి” అనే సందేశం ఈ పర్యటన ప్రధాన ఆకర్షణగా నిలిచింది.
