జమ్ముకశ్మీర్‌లోని పహల్గాంలో ఏప్రిల్ 22న జరిగిన ఉగ్రదాడి భారత్‌లో తీవ్ర ఆవేదనకు కారణమైంది. అయితే, ఈ ఘటనపై మిగిలిన ప్రపంచంతో పాటు పొరుగు దేశమైన పాకిస్తాన్‌లో కూడా తీవ్ర చర్చలు జరుగుతున్నాయి. ఈ దాడిపై అక్కడి సోషల్ మీడియా వేదికలపై పెద్ద ఎత్తున చర్చ జరుగుతోంది. గూగుల్‌లోనూ సంబంధిత కీవర్డ్స్ సరికొత్త హై ట్రెండ్‌కు చేరుకున్నాయి.
పాకిస్తాన్‌లోని ఇంటర్నెట్ వినియోగదారులు “Pahalgam”, “Pahalgam Attack”, “Kashmir”, “Modi”, “Jammu”, “Pulwama” వంటి పదాలతో గూగుల్‌లో విస్తృతంగా సెర్చ్ చేస్తున్నారు. ఇది అక్కడి ప్రజల్లో ఈ దాడిపై ఆసక్తి, ఆందోళన ఎంత ఉందో తెలియజేస్తోంది. ఈ ట్రెండ్స్ ద్వారా ఈ సంఘటనపై పాకిస్తాన్‌లో సైతం కలకలం నెలకొన్నట్లు స్పష్టమవుతోంది.
భారతీయ సోషల్ మీడియాలో #PahalgamTerroristAttack, #Modi వంటి హ్యాష్‌ట్యాగ్స్ ట్రెండ్ అవుతుండగా, పాకిస్తాన్ వినియోగదారులు కూడా తమదైన అభిప్రాయాలు వ్యక్తం చేస్తున్నారు. కొందరు ఈ దాడిని ఖండించగా, మరికొందరు రాజకీయం మేళవించిన వ్యాఖ్యలు చేస్తున్నారు.
ఈ దాడిపై పాకిస్తాన్ రక్షణ మంత్రి ఖ్వాజా ఆసిఫ్ స్పందిస్తూ, తమ దేశానికి ఈ ఘటనతో ఎలాంటి సంబంధం లేదని స్పష్టం చేశారు. ఉగ్రవాదంపై తమ దేశం కూడా వ్యతిరేకమేనని పేర్కొన్నారు. కానీ ప్రజా వర్గాల్లో ఈ ప్రకటనపై మిశ్రమ స్పందనలు వ్యక్తమవుతున్నాయి.
భారత రక్షణ మంత్రి రాజ్‌నాథ్ సింగ్ మాట్లాడుతూ, ఈ దాడిని కఠినంగా ఖండించారు. ఉగ్రవాదాన్ని భారత దేశం ఎప్పటికీ సహించదని, దానికి తగిన బలమైన ప్రతిస్పందన ఉంటుంది అన్నారు. “ఇది కేవలం అమానుష చర్య మాత్రమే కాదు, సిగ్గు కలిగించే చర్య. దీని వెనక ఉన్న వారినీ బయటకు లాగుతాం,” అని ఘాటుగా వ్యాఖ్యానించారు.
పహల్గాం దాడిపై పాకిస్తాన్ గూగుల్ సెర్చ్ ట్రెండ్స్‌లో కనిపిస్తున్న మూడ్ దేశీయ, అంతర్జాతీయ స్ధాయిలో ప్రతిస్పందన కలిగించినదిగా భావించవచ్చు. పాక్ ప్రజలు భారత్ చేపట్టిన చర్యలపైనా, ఉగ్రదాడి వెనుక మద్దతుదారులపైనా విశేషంగా ఆసక్తి చూపుతున్నారు.
