రష్యాతో సంబంధాలు కొనసాగిస్తున్నందుకు భారత్, చైనాపై అమెరికా మాజీ అధ్యక్షుడు డొనాల్డ్ ట్రంప్ తీవ్ర వ్యాఖ్యలు చేశారు. రష్యా నుండి చమురు కొనుగోలు చేసే దేశాలపై భారీ సుంకాలు విధిస్తామని హెచ్చరించారు. ఇప్పటికే భారత్‌పై 50 శాతం సుంకం విధించగా, చైనాపై కూడా అదే విధానం అమలు చేసే ఆలోచనలో ఉన్నట్లు తెలుస్తోంది. ఈ నేపథ్యంలో మోడీ, పుతిన్, జిన్‌పింగ్ ఒకే వేదికపై ప్రత్యక్షం కాబోతున్నారని వార్తలు రాజకీయ వర్గాల్లో ఆసక్తి రేపుతున్నాయి.
చైనా అధ్యక్షుడు జిన్‌పింగ్ ఆహ్వానం మేరకు టియాంజిన్‌లో జరగనున్న ఎస్‌సీవో (SCO) శిఖరాగ్ర సమావేశానికి భారత ప్రధాని నరేంద్ర మోడీ, రష్యా అధ్యక్షుడు వ్లాదిమిర్ పుతిన్ హాజరుకానున్నారు. ఆగస్టు 31 నుంచి సెప్టెంబర్ 1 వరకు జరగనున్న ఈ సమావేశానికి మధ్య ఆసియా, దక్షిణాసియా, ఆగ్నేయాసియా, మధ్యప్రాచ్యం దేశాలతో సహా 20 మందికి పైగా ప్రపంచ నాయకులు హాజరుకానున్నారు.
Also Read : జూబ్లీహిల్స్ ఉపఎన్నిక.. కాంగ్రెస్ మాస్టర్ ప్లాన్!
ఏడేళ్ల విరామం తర్వాత మోడీ తొలిసారిగా చైనాకు పర్యటించనుండటం విశేషం. 2020లో సరిహద్దు ఘర్షణలతో భారత్–చైనా సంబంధాలు దెబ్బతిన్నా, తాజాగా అవి పునరుద్ధరించబడుతున్నాయి. ఇటీవల విదేశాంగ మంత్రి జైశంకర్ చైనా పర్యటన కూడా దీనికి ఉదాహరణ.
ఈ సమావేశాన్ని “ప్రపంచ దక్షిణ సంఘీభావం”ను బలోపేతం చేయడానికి చైనా వేదికగా వినియోగించుకుంటుందని విశ్లేషకులు చెబుతున్నారు. చైనా గ్లోబల్ సౌత్ ప్రాజెక్ట్ ఎడిటర్ ఎరిక్ ఒలాండర్ ప్రకారం, రాబోయే ఈ భేటీ భారత్–చైనా–రష్యా త్రైపాక్షిక చర్చలకు ఒక పెద్ద అవకాశమని భావిస్తున్నారు.
2001లో SCO స్థాపించినప్పటి నుంచి ఈసారి జరగనున్న శిఖరాగ్ర సమావేశం అతిపెద్దదిగా నిలుస్తుందని చైనా విదేశాంగ మంత్రిత్వ శాఖ పేర్కొంది. భవిష్యత్‌లో కొత్త రకమైన అంతర్జాతీయ సంబంధాలను నిర్మించడంలో ఈ వేదిక కీలకపాత్ర పోషించనుందని విశ్లేషకులు అభిప్రాయపడుతున్నారు.
