వేసవిలో శరీరానికి తేమ, శక్తి చాలా అవసరం. పోషకాహార నిపుణుల సూచనల ప్రకారం, నీటి శాతం ఎక్కువగా ఉన్న పండ్లను ఈ కాలంలో తీసుకోవడం మంచిదని చెబుతున్నారు. ఎండల కారణంగా శరీరానికి నీరసం, అలసట ఎక్కువగా కనిపిస్తుంది. అలాంటప్పుడు బొప్పాయి తినడం ఆరోగ్యానికి ఎంతో మేలు చేస్తుంది. కానీ ఇది అందరికీ సరిపోతుందా? బొప్పాయి లాభనష్టాలు ఈ విషయాల్లో ఉన్నాయి.
బొప్పాయిలో సుమారు 88% నీరు ఉంటుంది. వేసవిలో తగ్గే శరీర తేమను దీని ద్వారా పూరించుకోవచ్చు. దీనితో పాటు నారింజ, పుచ్చకాయ, ఖర్బూజా, దోసకాయ వంటి పండ్లు కూడా మంచివని ఆరోగ్య నిపుణులు సూచిస్తున్నారు. బొప్పాయిలో ఉన్న విటమిన్ A, C, E చర్మానికి తేమనూ, ప్రకాశాన్ని అందిస్తాయి. వేసవి ప్రభావంతో కాంతిని కోల్పోయే చర్మానికి బొప్పాయి సహాయపడుతుంది.
బొప్పాయిలో ఉండే పపైన్ అనే ఎంజైమ్ జీర్ణక్రియను మెరుగుపరుస్తుంది. వేసవిలో సాధారణంగా వచ్చే అజీర్తి, గ్యాస్ సమస్యలకు ఇది సహాయపడుతుంది. రోజూ ఓ గిన్నె బొప్పాయి ముక్కలు తినడం వల్ల జీర్ణ సంబంధిత సమస్యలు తగ్గుతాయి. తక్కువ కేలరీలు, ఎక్కువ ఫైబర్ ఉన్న ఈ పండు బరువు తగ్గించడానికీ తోడ్పడుతుంది. అలాగే, వేసవిలో ఎండ కారణంగా కళ్ళు పొడిబారే అవకాశం ఉంది. దీనిలోని విటమిన్ A కళ్ళ ఆరోగ్యాన్ని రక్షిస్తుంది.
వేసవిలో తేలికపాటి ఆహారం అవసరం. బొప్పాయి మంచి ఎంపిక. దీనిలో అధికంగా ఉన్న విటమిన్ C రోగనిరోధక శక్తిని పెంచుతుంది. ఇన్ఫెక్షన్లను నిరోధించడంలో సహాయపడుతుంది.
ఉత్తమ ప్రయోజనాలు పొందాలంటే, ఉదయం ఖాళీ కడుపుతో బొప్పాయి తినడం మంచిది. అలాగే, బొప్పాయి ముక్కల్ని పాలు లేదా దహితో కలిపి స్మూతీగా తీసుకుంటే శరీరానికి మరింత చల్లదనం లభిస్తుంది. ఇందులోని యాంటీఆక్సిడెంట్లు చెడు కొలెస్ట్రాల్ (LDL) తగ్గించి గుండె ఆరోగ్యాన్ని మెరుగుపరుస్తాయి.
జాగ్రత్తలు:
బొప్పాయిలో ఫైబర్ అధికంగా ఉండటంతో, ఎక్కువగా తీసుకుంటే డయేరియా, విరేచనాలు వంటి సమస్యలు రావచ్చు. గర్భిణీలు ప్రత్యేకంగా జాగ్రత్తలు తీసుకోవాలి. అలాగే, కొంతమందికి బొప్పాయి తింటే అలెర్జీ రావచ్చు.. బొప్పాయి తిన్న తర్వాత చర్మంపై దద్దుర్లు, దురద, వాపు కనిపిస్తే వెంటనే వైద్య సలహా తీసుకోవాలి.
