తమిళ హీరో విశాల్ తన పుట్టినరోజు సందర్భంగా అభిమానులకు సర్‌ప్రైజ్ ఇచ్చారు. తన కాబోయే భార్యను పరిచయం చేస్తూ ఎంగేజ్మెంట్ ఫొటోలు షేర్ చేశారు. కుటుంబ సభ్యులు, బంధువుల సమక్షంలో విశాల్ తన ప్రేయసి సాయి ధన్సికను నిశ్చితార్థం చేసుకున్నారు. ఈ విషయాన్ని ఎక్స్‌ ద్వారా తెలియజేస్తూ, “ఎప్పటిలాగే మీ అందరి ఆశీర్వాదాలు మాపై ఉండాలి” అని పోస్ట్ చేశారు. దీంతో అభిమానులు, సినీ ప్రముఖులు విశాల్‌కు శుభాకాంక్షలు తెలియజేస్తున్నారు.
గత కొంతకాలంగా రిలేషన్‌షిప్‌లో ఉన్న విశాల్-సాయి ధన్సిక జంట ఈ ఏడాది మేలో తమ ప్రేమను అధికారికంగా ప్రకటించారు. వాస్తవానికి ఈరోజే పెళ్లి జరగాల్సి ఉన్నా, విశాల్ ‘నడిగర్ సంఘం’ (South Indian Artistes Association) భవన నిర్మాణ పనుల్లో బిజీగా ఉండటంతో పెళ్లి వాయిదా వేసుకున్నట్లు తెలుస్తోంది. భవనం పూర్తయిన తర్వాతే పెళ్లి చేసుకుంటానని విశాల్ ఇంతకుముందే ప్రకటించారు. త్వరలోనే పెళ్లి తేదీని ప్రకటించనున్నారు.
Thank u all u darlings from every nook and corner of this universe for wishing and blessing me on my special birthday. Happy to share the good news of my #engagement that happend today with @SaiDhanshika amidst our families.feeling positive and blessed. Seeking your blessings and… pic.twitter.com/N417OT11Um
— Vishal (@VishalKOfficial) August 29, 2025
సాయి ధన్సిక కూడా సినీ ఇండస్ట్రీకి చెందిన అమ్మాయే. జూనియర్ ఆర్టిస్ట్‌గా కెరీర్ ప్రారంభించిన ఆమె, తన నటనతో హీరోయిన్‌గా అవకాశాలు పొందింది. రజనీకాంత్ కబాలి సినిమాలో హీరో కూతురి పాత్రలో ఆకట్టుకుంది. ఆ తర్వాత షికారు, అంతిమ తీర్పు, దక్షిణ వంటి టాలీవుడ్ చిత్రాల్లో హీరోయిన్‌గా నటించింది. ప్రస్తుతం తమిళ్ సినిమాలతో బిజీగా ఉంది.
విశాల్ సినిమాల విషయానికి వస్తే, ప్రస్తుతం ఆయన ‘మకుటం’ అనే చిత్రంలో నటిస్తున్నారు. ఇటీవల విడుదలైన టైటిల్ అనౌన్స్మెంట్ గ్లింప్స్ వీడియో మంచి రెస్పాన్స్ సంపాదించింది. పోర్ట్ ఏరియా, స్మగ్లింగ్ నేపథ్యంలో రూపొందుతున్న ఈ యాక్షన్ ఎంటర్‌టైనర్‌కి రవి అరసు దర్శకత్వం వహిస్తున్నారు. సూపర్ గుడ్ ఫిలిమ్స్ బ్యానర్‌పై ఇది విశాల్ 35వ చిత్రం గా తెరకెక్కుతోంది.
