‘కలర్ ఫోటో’ సినిమాతో జాతీయ అవార్డు గెలుచుకున్న దర్శకుడు సందీప్ రాజ్ ప్రస్తుతం ఓ వివాదంలో చిక్కుకున్నారు. ఆయన నిర్మాతగా వ్యవహరించిన వెబ్ సిరీస్ ‘ఆల్ ఇండియా ర్యాంకర్స్’ (AIR) ఒక కులాన్ని లక్ష్యంగా చేసుకుని సన్నివేశాలు రూపొందించారన్న ఆరోపణల నేపథ్యంలో వివాదంలోకి చేరింది. ఈటీవీ విన్ ఓటీటీలో స్ట్రీమింగ్‌లో ఉన్న ఈ సిరీస్‌లోని కొన్ని డైలాగులు, సన్నివేశాలు కమ్మ సామాజిక వర్గాన్ని కించపరిచేలా ఉన్నాయని విమర్శలు వెల్లువెత్తాయి.
వివాదం ఎలా మొదలైంది?
జోసెఫ్ క్లింటన్ దర్శకత్వం వహించిన ఈ సిరీస్‌లో పదోతరగతి తర్వాత ఇంటర్ చదవడానికి విజయవాడ వచ్చిన ముగ్గురు విద్యార్థుల జీవితం, ఒత్తిడి, హాస్టల్ అనుభవాలను చూపించారు. అయితే ఇందులో హాస్టల్ నేపథ్యంలో వచ్చే ఒక సన్నివేశం, కొన్ని సంభాషణలు కమ్మ వర్గాన్ని ఉద్దేశించి చెడుగా చూపించాయన్న అభియోగాలు వినిపించాయి. దీనిపై నెటిజన్లు ఆగ్రహం వ్యక్తం చేశారు.
సందీప్ రాజ్ క్షమాపణ
వివాదం ముదరడంతో దర్శకుడు సందీప్ రాజ్ స్పందించారు. ‘‘ఈ సారి వదిలేయండి, మళ్లీ ఈ తప్పు జరగదు. ఉద్దేశపూర్వకంగా ఎవరినీ కించపరచలేదను. నేను నిజంగా చింతిస్తున్నాను’’ అంటూ సోషల్ మీడియాలో క్షమాపణ చెప్పారు. అంతేకాకుండా, వివాదాస్పద సన్నివేశాలను సిరీస్‌లో నుంచి తొలగించినట్టు ప్రకటించారు.
ఈటీవీ విన్ ప్రకటన
ఈటీవీ విన్ కూడా ఈ వివాదంపై స్పందించింది. భవిష్యత్తులో ఇలాంటి సంఘటనలు జరగకుండా కంటెంట్ విషయంలో మరింత జాగ్రత్తగా ఉంటామని స్పష్టం చేసింది.
ఈ వ్యవహారం వెబ్ కంటెంట్ పై సమాజం ఎంతగా ప్రభావం చూపించగలదో మరోసారి స్పష్టం చేస్తోంది.
