సనాతన ధర్మంలో నవరాత్రులు అత్యంత పవిత్రమైనవి. ప్రతి సంవత్సరం భక్తులు ఈ పండుగను ఎంతో శ్రద్ధగా జరుపుకుంటారు. ఈ తొమ్మిది రోజులలో కొన్ని ప్రత్యేక వస్తువులను ఇంటికి తీసుకురావడం శుభప్రదమని పండితులు సూచిస్తున్నారు. వాటివల్ల సంపద, సౌభాగ్యం, సానుకూల శక్తి ఇంట్లో నెలకొంటాయని విశ్వాసం.
వెండి నాణెం
నవరాత్రుల సమయంలో వెండి నాణెం కొనుగోలు చేయడం శుభప్రదం. వెండి లక్ష్మీదేవి స్వరూపంగా పరిగణించబడుతుంది. ఈ నాణెంను తొమ్మిది రోజులు పూజిస్తే సంపద పెరుగుతుందని, ఆర్థిక ఇబ్బందులు తొలగుతాయని నమ్మకం. పసుపు, కుంకుమతో పూజించి ఇంట్లో ఉంచితే మరింత మంచి ఫలితాలు వస్తాయి.
తులసి మొక్క
ఇంట్లో తులసి మొక్క లేకుంటే నవరాత్రి సందర్భంగా తెచ్చుకోవడం శ్రేయస్కరం. తులసిని లక్ష్మీదేవి రూపంగా భావిస్తారు. తులసిని పూజించడం వల్ల దేవి అనుగ్రహం లభించి ఇంట్లో సౌఖ్యం, సంపద పెరుగుతాయని నమ్మకం. తులసికి ప్రతిరోజూ నీరు పోసి దీపం వెలిగించడం వల్ల ఇంట్లో సానుకూల శక్తి ఉంటుంది.
సువాసన పూలు
దుర్గాదేవి పూజలో సుగంధ పూల ప్రాధాన్యం ఎక్కువ. సంపంగి, గులాబీ, మల్లె వంటి పూలను సమర్పించడం శుభప్రదమని భావిస్తారు. పూల సువాసన ఇంట్లో సానుకూల వాతావరణాన్ని సృష్టిస్తుంది.
గంగాజలం
పూజలలో గంగాజలం పవిత్రతకు ప్రతీక. నవరాత్రులలో గంగాజలంతో ఇంటిని శుద్ధి చేయడం, పూజల్లో వినియోగించడం శుభప్రదం. ఇంట్లో గంగాజలం ఉంచుకోవడం వల్ల ప్రతికూల శక్తులు దూరమవుతాయని విశ్వాసం.
రాగి చెంబు
రాగి పవిత్ర లోహంగా పరిగణించబడుతుంది. నవరాత్రి పూజలో రాగి చెంబును కలశ స్థాపన కోసం ఉపయోగించడం శుభప్రదం. ఇందులో పసుపు, కుంకుమ, బియ్యం, నాణెం వేసి పూజిస్తే దేవి కటాక్షం లభిస్తుందని నమ్మకం.
నవరాత్రి పూజా విధానం
ప్రతిరోజూ ఉదయం తలస్నానం చేసి శుభ్రమైన దుస్తులు ధరించాలి.
పూజా గదిలో కలశ స్థాపన చేయాలి.
అమ్మవారికి ప్రతిరోజూ నైవేద్యం సమర్పించాలి.
ఉపవాసం పాటిస్తే దేవి ఆశీస్సులు మరింత లభిస్తాయి.
ఎర్రటి వస్త్రాలు, పుష్పాలతో అమ్మవారిని పూజిస్తే శుభఫలితాలు వస్తాయి.
