అక్షయ తృతీయ అంటేనే శుభదినాల పుట్టిన రోజు అని చెప్పవచ్చు. వైశాఖ మాస శుక్ల పక్ష తృతీయ రోజున వచ్చే ఈ పర్వదినం హిందూ ధర్మంలో అత్యంత పవిత్రమైనదిగా భావిస్తారు. ఈ ఏడాది అక్షయ తృతీయ ఏప్రిల్ 30న జరగనుంది. ఈ దినం సూర్యుడు, చంద్రుడు అత్యంత శుభస్థితిలో ఉండే రోజు కావడంతో, ఏ పనిని ప్రారంభించినా క్షీణించకుండా ‘అక్షయ’ ఫలితాలు అందుతాయని నమ్మకం.
ఈరోజున బంగారం కొనుగోలు, భూమి లావాదేవీలు, పుణ్య కార్యాలు చేయడం శుభప్రదం. అంతేకాదు, శాస్త్రప్రకారం ఈ రోజున “అక్షయ పాత్ర”ను ఇంట్లో ఏర్పాటు చేసి పూజిస్తే అదృష్టం తలుపుతడతుందని జ్యోతిష్య నిపుణులు చెబుతున్నారు. ఆ అక్షయ పాత్రను ఎలా తయారుచేయాలి? దానివల్ల వచ్చే ఫలితాలు ఏమిటి? ఇప్పుడు చూద్దాం.
ఇలా తయారుచేయండి అక్షయ పాత్ర:
పాత్ర ఎంపిక: ఒక చిన్న వెండి, ఇత్తడి, కంచు లేదా మట్టితో చేసిన కుండను (గురిగిని) ఇంటికి తీసుకురావాలి.
పసుపు పూత: ఒక గిన్నెలో పసుపు, కర్పూరం, జవ్వాది, రోజ్ వాటర్ కలిపి కుండపై ఎక్కడా ఖాళీ లేకుండా రాసాలి.
కుంకుమ పూయడం: మరో గిన్నెలో కుంకుమ, జవ్వాది, పచ్చ కర్పూరం, రోజ్ వాటర్ కలిపి మిశ్రమం తయారుచేసి.. ఉంగరపు వేలితో కుండపై “శ్రీం” అనే బీజాక్షరాన్ని రాయాలి. దానికి రెండు వైపులా కుంకుమ బొట్లు పెట్టాలి.
పాత్రలో ఆవశ్యకమైన పదార్థాలు: అలంకరించిన పాత్రలో కొద్దిగా పసుపు, కర్పూరం పొడి, రాళ్ల ఉప్పు వేసి మంత్రోచ్ఛారణలతో పూజ చేయాలి.
డబ్బు ఉంచడం: ఎరుపు గుడ్డ ముక్కలో కొంత నగదు పెట్టి, దానిని అక్షయ పాత్రలో ఉంచాలి.
ఆ తర్వాత ఏమి చేయాలి?
పూజ తర్వాత ఆ డబ్బును మంగళవారం వరకు పాత్రలోనే ఉంచాలి. ఆ తర్వాత దానిని బీరువాలో లేదా మీ ఇంట్లో డబ్బు దాచుకునే ప్రదేశంలో భద్రపరిస్తే, లక్ష్మీ కటాక్షం కచ్చితంగా కలుగుతుందని నమ్మకం ఉంది. జ్యోతిష్య నిపుణుల మాటల ప్రకారం ఇది ఓ శక్తివంతమైన ఆధ్యాత్మిక ప్రక్రియ. దీనివల్ల ఇంట్లో ధనసంపద పెరుగుతుందని విశ్వసిస్తున్నారు.
ఈ అక్షయ తృతీయ సందర్భంగా మీరు కూడా ఈ విధంగా అక్షయ పాత్రను సిద్ధం చేస్తే శుభఫలితాలు పొందొచ్చు. ఇది సంపద కోసం శుభప్రదమైన ఆచారంగా పురాణాలు చెబుతున్నాయి.
