డొనాల్డ్ ట్రంప్ ప్రభుత్వం హెచ్1బీ వీసా దరఖాస్తులకు మరో కీలక నిర్ణయం తీసుకుంది. కొత్త విధానం ప్రకారం, ప్రతి హెచ్1బీ వీసా దరఖాస్తుకు $100,000 (సుమారు రూ.83 లక్షలు) చెల్లించాల్సి ఉంటుంది. ఈ నిర్ణయం ప్రధానంగా అమెరికాలోని టెక్ రంగం, ముఖ్యంగా భారతీయ ఐటీ నిపుణులపై తీవ్ర ప్రభావం చూపవచ్చని నిపుణులు హెచ్చరిస్తున్నారు. వైట్‌హౌస్ వర్గాల ప్రకారం, అమెరికన్లకు ఉద్యోగ అవకాశాలను పెంచడమే ఈ నిర్ణయం ప్రధాన ఉద్దేశ్యం.
ప్రస్తుతం, హెచ్1బీ వీసా దరఖాస్తు ఖర్చు కొన్ని వందల డాలర్లే. కానీ కొత్త నిబంధన ప్రకారం, $100,000 ఫీజు కంపెనీలు భరించకపోతే, దరఖాస్తుదారులు తాము చెల్లించాల్సి ఉంటుంది. ఇది చిన్న, మధ్యస్థాయి కంపెనీలపై ఆర్థిక భారాన్ని పెంచి, విదేశీ నిపుణులను నియమించడం కష్టమవ్వవచ్చు.
1990లో నైపుణ్యం కలిగిన విదేశీ నిపుణుల కోసం హెచ్1బీ వీసా ప్రవేశపెట్టబడింది. అమెరికా టెక్ కంపెనీలు విదేశీ నిపుణుల కోసం ఈ వీసాలు జారీ చేస్తాయి. ఇండియా ఈ వీసాల్లో 71% వాటా, చైనా 11.7% వాటా కలిగి ఉంది. హెచ్1బీ వీసాలు 3-6 సంవత్సరాల మధ్య కాలానికి మంజూరు చేయబడతాయి. అమెరికా సంవత్సరానికి 85,000 వీసాలను లాటరీ విధానం ద్వారా ఇస్తుంది.
BREAKING: America raises H1B visa fee to $100,000 per person per year
“This will stop Big Tech companies from bringing in foreign workers who will take our jobs,” says Commerce Secretary Howard Lutnick in a move that will hit Indian tech workers in America pic.twitter.com/aVKfUnijne
— Shashank Mattoo (@MattooShashank) September 19, 2025
ప్రధాన కారణం హెచ్1బీ వీసా దుర్వినియోగాన్ని అరికట్టడం. కొన్ని కంపెనీలు తక్కువ జీతాలకు విదేశీ ఉద్యోగులను నియమించడం ద్వారా అమెరికన్ ఉద్యోగుల వేతనాలను తగ్గించేందుకు ప్రయత్నిస్తున్నారని ఆరోపణలు ఉన్నాయి. కొత్త ఫీజు కారణంగా కంపెనీలు అత్యంత నైపుణ్యం కలిగిన నిపుణులను మాత్రమే నియమిస్తాయి, తద్వారా స్థానిక ఉద్యోగులకు నష్టం జరగదు అని వైట్‌హౌస్ పేర్కొంది.
అయితే, టెక్ దిగ్గజాలు, నిపుణుల నుండి భిన్న అభిప్రాయాలు వస్తున్నాయి. హెచ్1బీ వీసా ప్రోగ్రామ్ అమెరికా ఆర్థిక వ్యవస్థ, సాంకేతిక ఆవిష్కరణలకు కీలకమని, ఈ మార్పులు దేశీయ ఆవిష్కరణలను అడ్డుకోవచ్చని కొందరు హెచ్చరిస్తున్నారు. భారీ ఫీజుల కారణంగా కొన్ని కంపెనీలు కార్యకలాపాలను ఇతర దేశాలకు మార్చే అవకాశం ఉందని కూడా నిపుణులు చెబుతున్నారు.
ఈ పరిణామాలు భారతీయ ఐటీ నిపుణులు, అమెరికాకు ఉద్యోగాలు లేదా ఉన్నత విద్య కోసం వెళ్లాలనుకునే విద్యార్థుల కోసం ఆందోళన కలిగించే అంశాలు అని నిపుణులు చెబుతున్నారు.
