టాలీవుడ్ హీరో మంచు విష్ణు డ్రీమ్ ప్రాజెక్ట్‌గా తెరకెక్కిస్తున్న “కన్నప్ప” సినిమా విడుదల వాయిదా పడింది. భారీ తారాగణం, అత్యధిక బడ్జెట్‌తో తెరకెక్కుతోన్న ఈ పాన్ ఇండియా సినిమా కోసం అభిమానులు ఎంతగానో ఎదురుచూస్తున్నారు. అయితే, తాజా పరిణామాలతో వారికి నిరాశ ఎదురైంది.
“కన్నప్ప” సినిమాను ముఖేష్ కుమార్ సింగ్ దర్శకత్వం వహిస్తుండగా, ఇందులో ప్రభాస్, అక్షయ్ కుమార్, మోహన్ లాల్, కాజల్ అగర్వాల్, శరత్ కుమార్, బ్రహ్మానందం, మధుబాల, ముఖేష్ రిషి వంటి టాప్ స్టార్లు కీలక పాత్రలు పోషిస్తున్నారు. మంచు మోహన్ బాబు అత్యంత భారీ స్థాయిలో నిర్మిస్తున్న ఈ చిత్రంపై భారీ అంచనాలున్నాయి.
ఇప్పటికే ఫస్ట్ లుక్, టీజర్, సాంగ్స్ సినిమాపై ఆసక్తిని రెట్టింపు చేయగా, తాజాగా మంచు విష్ణు షాకింగ్ అనౌన్స్‌మెంట్ ఇచ్చాడు. కొన్ని కీలక VFX వర్క్ పూర్తికాకపోవడంతో సినిమా విడుదలను వాయిదా వేస్తున్నట్టు అధికారికంగా ప్రకటించాడు.
My Sincere Apologies! pic.twitter.com/WbAUJIVzHq
— Vishnu Manchu (@iVishnuManchu) March 29, 2025
“అత్యుత్తమ క్వాలిటీతో సినిమాను మీ ముందుకు తీసుకురావాలనుకుంటున్నాం. అయితే కొన్ని కీలక VFX సన్నివేశాలకు ఇంకా సమయం కావాలి. అందువల్ల సినిమాను ఆలస్యంగా విడుదల చేయాల్సి వచ్చింది. మీ అండతో మరింత భరోసాగా ముందుకు సాగుతాం. త్వరలోనే కొత్త రిలీజ్ డేట్ ప్రకటిస్తాం.” అని విష్ణు ఓ అధికారిక ప్రకటన విడుదల చేశాడు.
ఈ నిర్ణయంతో ప్రభాస్ ఫ్యాన్స్ సహా సినిమా ప్రేక్షకులు తీవ్ర నిరాశకు గురయ్యారు. అయితే, మేకర్స్ హై క్వాలిటీ VFX, గ్రాండ్ ప్రొడక్షన్ వాల్యూస్‌తో సినిమాను ప్రేక్షకుల ముందుకు తీసుకురావాలని ప్లాన్ చేస్తున్నారు. త్వరలోనే కన్నప్ప కొత్త రిలీజ్ డేట్ ప్రకటించనున్నారు.
