మహేంద్ర సింగ్ ధోని.. ఒక పేరు కాదు, ఒక బ్రాండ్! క్రికెట్‌లో ఫినిషింగ్ మాస్టర్‌గా రికార్డులు సృష్టించిన ధోని, 2019లో అంతర్జాతీయ క్రికెట్‌కు గుడ్‌బై చెప్పినా, ఐపీఎల్‌లో మాత్రం తన మ్యాజిక్ కొనసాగిస్తూనే ఉన్నాడు. ఈసారి కూడా అతని బ్యాట్ మోత మరోసారి అభిమానులను ఉర్రూతలూగించింది.
CSKకి చివరి 12 బంతుల్లో 39 పరుగులు అవసరం. ఎల్లో ఆర్మీ ధోని నుంచి మరో మాస్టర్‌క్లాస్ ఫినిష్ ఆశించింది. 19వ ఓవర్ మొదటి బంతికే బౌండరీ కొట్టిన ధోని, నాలుగో బంతికి తన సిగ్నేచర్ స్టైల్‌లో అదిరిపోయే సిక్స్ బాదాడు. అది కేవలం ఓ సిక్స్ కాదు.. గత ఐపీఎల్ సీజన్లలో ధోని కొట్టిన ఫినిషింగ్ షాట్లను గుర్తు చేసే విధంగా ఉండింది.
ఈ మ్యాచ్ రాజస్థాన్ రాయల్స్ హోమ్ గ్రౌండ్ గౌహతిలో జరిగినా, స్టేడియం మొత్తం పసుపు రంగులోకి మారిపోయింది. ఎందుకంటే ధోని బ్యాటింగ్‌కి దిగినప్పటి నుంచి “ధోని… ధోని…” నినాదాలతో స్టేడియం హోరెత్తిపోయింది. రాజస్థాన్ అభిమానులు కన్నా CSK ఫ్యాన్స్ హవా ఎక్కువగా కనిపించింది. అదే ఓవర్లో రవీంద్ర జడేజా కూడా ఓ సిక్స్ కొట్టి, పాత CSK మ్యాజిక్ రిపీట్ అవుతుందనే ఆశ కలిగించాడు.
ధోని-జడేజా మళ్లీ మ్యాచ్‌ను తిరగరాస్తారా? అనే ఉత్కంఠ తారాస్థాయికి చేరుకుంది. కానీ చివరి ఓవర్ వేయడానికి వచ్చిన సందీప్ శర్మ తన అనుభవాన్ని ఉపయోగించి అద్భుతంగా బౌలింగ్ చేశాడు. ధోని లాంగ్ ఆన్ బౌండరీ వద్ద క్యాచ్ ఔట్ అయ్యాడు. చివరికి CSK ఆరు పరుగుల తేడాతో ఓడిపోయింది, కానీ ధోని మాత్రం మరోసారి తన మ్యాజిక్‌తో అభిమానులను ఉత్కంఠకు గురిచేశాడు.
ధోని ఉన్నంతకాలం ఐపీఎల్ ఉత్సాహం తగ్గదు. అతను మళ్లీ ఓ మేజిక్ ఇన్నింగ్స్ ఆడతాడా? అభిమానులు కళ్లప్పగించి ఎదురు చూస్తూనే ఉన్నారు. RR vs CSK మ్యాచ్‌లో ధోని తన స్టైల్‌లో సిక్స్ కొట్టడం, మ్యాచ్‌ను ఉత్కంఠతరంగా మార్చడం క్రికెట్ ప్రేమికులకు మరింత అనుభూతిని మిగిల్చింది. CSK కి ఓటమి ఎదురైనా ధోని అందర్నీ కుర్చీల అంచున కూర్చోబెట్టాడు. ఇప్పట్లో అయితే ధోని క్రేజ్ చల్లారేలా లేదు! అభిమానుల గుండెల్లో ధోని సిక్సర్లు చిరస్థాయిగా నిలిచిపోతాయి!
